27 ABRIL – 27 XULL

Lindeira, a primeira exposición individual de Sonia Navarro en Vilaseco, trae a Galicia o traballo más recente da artista murciana e conta con diferentes obras téxtiles e obra sobre papel.

Co título Lindeira, a artista quere pór o foco sobre a necesidade das mulleres de romper cos lindes, as fronteiras e os límites que lles impón a sociedade.

Conforman a exposición dez pezas, realizadas en diversos materiais como esparto, feltro, papel e madeira. Obras que son collages, pero tamén esculturas bidimensionais. Unha mostra na que podemos ver cómo Sonia Navarro reinterpreta elementos relacionados coa costura, como poden ser os patróns de xastre, os balcóns típicos de Murcia, todos relacionados directamente co traballo das mulleres.

Balcón I, II, III e IV son obras de gran formato en feltro negro que a artista coseu coa axuda da súa nai, están suspendidas do teito na sala principal conformando catro balcóns/estandartes, que reciben ao espectador á súa chegada á galería, festexando a xeracións de mulleres que cosían no entorno do fogar, como o fixeron as avoas e as tías coas que aprendeu a artista.

No muro oposto á balconada, na mesma sala, atopámonos con Caminos de trazo, unha serie de oito collages de PVC cosido que nos recordan aos mapas topográficos, onde cada trozo de tela sería unha zona e o pespunte debuxaría os camiños. Completa a sala a peza L.A.I., unha colaxe de pequeno formato realizado en feltro sobre bastidor.

Na sala contigua atopamos dúas pezas en releve con gran presenza escultórica realizadas en esparto sobre estructura de madeira. Son obras que lle confiren unha gran plasticidade ao material co que están realizadas, adoptando deste modo unha textura moi similar á da tea. A utilización do esparto fálanos, ademais, da recuperación dunha técnica ancestral que, debido á xeneralización do uso de materiais plásticos, estase a perder.

Sonia Navarro leva dúas décadas mostrando con diferentes linguaxes, como a escultura e a instalación, a fotografía e o debuxo, un discurso que cuestiona e confronta os mecanismos de poder e as súas institucións, especialmente aqueles que colaboraron na xerarquía histórica do xéneros. A relación da muller nas tarefas domésticas e a imposibilidade do movemento, así como a constante loita das mulleres e os estándares establecidos, son as cuestións que aborda a artista na súa obra na que emprega a costura e o tecido do esparto.